Winner – Spica Lin

Feminist Literature Competition (Round 1)
Winner – Spica Lin

မှန်တစ်ချပ် ရှေ့မှာ ခဏရပ်မိချိန်
ကောက်တွန့်လိမ်နေတဲ့ ဆံပင်တွေက ဖွလန်ကြဲလို့။
မျက်လုံးအောက်ဘက်မှာ ခပ်ညိုညို။
ပါးရိုးပေါ်က အနီဖျော့ရောင်နဲ့ လက်ချောင်းရာတွေ။
သက်ပြင်းတစ်ချက်ကို အသာချ ညာဘက် ပါးပေါ်က
မျက်ရည်တစ်စက်ကို တွန်းဖိဖယ်ရင်း ဆုံးဖြတ်ချက် တစ်ခု ဖြစ်တည်လာခဲ့တယ်။
ကျွန်မ ကိုယ်ခန္ဓာကိုယ်ကို ကျွန်မ မပိုင်ဘူးလား။
ကျွန်မ နှစ်သက်တဲ့ လှောင်အိမ်ပုံ တက်တူးလေး တစ်ခု
လွယ်လွယ် မမြင်နိုင်တဲ့ လက်မောင်းပေါ်မှာ ရောက်လာချိန်
ကျွန်မ ကိုယ်ခန္ဓာကြီး အနှိပ်စက် ခံနေရပြီ။
မျက်နှာရှိမှ လူဖြစ်လာတာ ဆိုရင်
ကျွန်မက ဒဏ်ရာဒဏ်ချက်တွေနဲ့ လူ။
လူတစ်ယောက်ရဲ့ တန်ဖိုးက မျက်နှာပေါ်မှာဆိုရင်
ကျွန်မ ရဲ့ တန်ဖိုးမှာ လက်ချောင်းရာတွေ ရောထွေးနေပြီ။
ဆုံးဖြတ်ချက် တစ်ခုအတွက် အချိန် အတော်ကြာအောင်
ဝေ၀ါးနေခဲ့ပြီးပြီ။
လမ်းပေါ်မရောက်ခင် လမ်းပျောက်မှာ သိနေခဲ့ပေမဲ့
ကျွန်မ ကိုယ် ကျွန်မ ပိုင်ဆိုင်ချင်နေပြီ။
သတင်းစာထဲမှာ အမွေစားအမွေခံ အဖြစ်မှ စွန့်လွှတ်ခြင်း နှင့်
ပြဿနာကြီးငယ် ဟူသရွေ့ မသက်ဆိုင်တော့ပါကြောင်း တဲ့။
ကျွန်မ ဟားတိုက် ရယ်မောလိုက်တယ်။
ကျွန်မ ရဲ့ လွတ်မြောက်မှု အတွက် ကိုယ့်ကိုယ်ကို ဂုဏ်ပြုသင့်နေပြီ။
နောက်ဖေး လမ်းကြားမှာပဲ ခိုးသောက်ခွင့်ရခဲ့တဲ့ စီးကရက်ကို နှုတ်ခမ်းမှာ ပြန်ကိုက်လိုက်တယ်။
ကျန်းမာရေး ထိခိုက်တာတော့ ကျွန်မ သိတာပေါ့။
မိန်းမတစ်ယောက်ရဲ့ အိန္ဒြေကြောင့်ဆိုတဲ့ အကြောင်းပြချက်ကြီးနဲ့ အချိန်အတော်ကြာ မြိုသိပ်ထားရတဲ့
လုပ်ပိုင်ခွင့်တွေကို ကျွန်မ အကုန်လုပ်ပစ်မယ်။
နင် က မိန်းကလေး ဆိုတဲ့ စကားလုံးကို ကျွန်မ မုန်းတီးနေပြီ။
မိန်းကလေးဆိုတဲ့ ဘောင်အောက်မှာ အနေအထိုင် အသွားအလာ အပြောအဆို အားလုံးကို မမြင်ရတဲ့
သံကြိုးတွေနဲ့ ချည်တုတ်ခံခဲ့ရပြီးပြီ။
အခုတော့ ဒီသံကြိုးတွေကနေ ကျွန်မ ရုန်းထွက်နိုင်ခဲ့ပြီ။
ဒါကြောင့် စီးကရက်ကို မနှစ်သက်ပေမဲ့ အခွင့်အရေးတစ်ခု အနေနဲ့ မြည်းစမ်းကြည့်တယ်။
အခုဆို ကျွန်မ လက်ဖျံပေါ်မှာ တက်တူးကြီးကြီး တစ်ခု ရှိနေပြီ။
လက်မောင်းက လှောင်အိမ်လေးထက် ပိုကြီးတဲ့ ငှက်တစ်ကောင် ပုံ လေ။
ယမကာ အရက်တွေလား..။
အိုး…မကြိုက်ပေမဲ့ သောက်ကြည့်တာပါပဲ။
ကျွန်မ သိခဲ့တဲ့ လောကကြီးကဘောင်လေးကသိပ်ကျဥ်းခဲ့တာရှင့်။
မိန်းမဆိုတာ ယောကျ်ား တွေလို နေချင်သလို နေလို့မရဘူးဆိုတဲ့ ခံယူချက် တစ်ဆင့်နိမ့်တွေနဲ့ပေါ့။
အို…ကျွန်မ သိပ်ပင်ပန်းခဲ့ရတာပဲ။
မိန်းကလေး ဖြစ်နေလို့ ပင်ပန်းခဲ့ရပြီးပြီ။
မိသားစု၀င်တွေရဲ့ မွေးနေ့ပွဲလေးမှာ ကျွန်မ စိတ်မသက်သာတဲ့ ဂါ၀န်တွေ ၀တ်ရတဲ့အခါ ပင်ပန်းခဲ့တယ်။
ကျွန်မ မနှစ်သက်တဲ့ မိတ်ကပ်ထူထူတွေနဲ့ အလှပြင်ပြီး အိန္ဒြေရရ ပြုံးပြရတဲ့အခါ ပင်ပန်းခဲ့တယ်။
ကျွန်မရဲ့ ပင်ကိုယ် ဆံပင်ကောက်တွေကို ကြည့်ကောင်း ဖြောင့်စင်းနေအောင် အချိန်ပေး ပြုပြင်ရတဲ့အခါ ပင်ပန်းခဲ့တယ်။
ကျွန်မ အရပ်ကို အပြောင်းအလဲဖြစ်အောင် မြင့်လွန်းတဲ့ ဒေါက်ဖိနပ်တွေ စီးရတဲ့အခါ ပင်ပန်းခဲ့တယ်။
ကျွန်မ စိတ်မ၀င်စားတဲ့ အိမ်မှုကိစ္စတွေကို လေ့လာသင်ယူရတဲ့အခါ ပင်ပန်းခဲ့တယ်။
ကျွန်မ မိရိုးဖလာ ရိုးရာ တွေ အရ ယောကျ်ားလေးတွေပဲ လုပ်ခွင့်ရှိတယ်လို့ ယူဆထားတာကို လုပ်မိလို့
ကိုယ်ထိလက်ရောက် ဆုံးမ ခံရတဲ့အခါ ပင်ပန်းခဲ့တယ်။
ကျွန်မ ပတ်၀န်းကျင်က ဟာသ တစ်ခုကို စိတ်တိုင်းကျ ဟက်ဟက်ပက်ပက် အော်ရယ်ခွင့် မရှိတဲ့အခါ
ပင်ပန်းခဲ့တယ်။
ကျွန်မ စိတ်တိုင်းမကျတဲ့အချိန် ခပ်တိုးတိုး ဆဲဆိုခွင့်တောင် မရှိတဲ့အခါ ပင်ပန်းခဲ့တယ်။
ကျွန်မ နဲ့ လုံချည်က လိုက်ဖက်တယ်ဆိုပြီး ကျွန်မ ကြိုက်တဲ့ ဂျင်းဘောင်းဘီ ၀တ်ခွင့်မရှိတဲ့အခါ ပင်ပန်းခဲ့တယ်။
ကျွန်မ ဆိုးချင်တဲ့ နှုတ်ခမ်းနီရဲရဲ ကို အမြင်ရိုင်းတယ်ဆိုတဲ့ မယူအဆ နဲ့ ဆိုးခွင့်မရတဲ့အခါ ပင်ပန်းခဲ့တယ်။
ကျွန်မ စိတ်၀င်စားတဲ့ ယောကျ်ားလေးတစ်ယောက်ကို စိတ်ထဲ ရှိတဲ့အတိုင်း ပေါ်ပေါ်ထင်ထင် ငေးကြည့်ခွင့်မရတဲ့အခါ ပင်ပန်းခဲ့တယ်။
ကျွန်မ မျက်နှာပေါ်က ၀က်ခြံကိုတောင် လက်နဲ့ စိတ်ရှိတိုင်း ညှစ်ခွင့်မရှိတဲ့အခါ ပင်ပန်းခဲ့တယ်။
ကျွန်မ ကြိုက်တဲ့ အစားအစာတွေကို စားခွင့်မရတဲ့အခါ ပင်ပန်းခဲ့တယ်။
ကျွန်မ ရဲ့ ကိုယ်ခန္ဓာကို ၀က်ဖြစ်တော့မယ်လို့ သတိပေးခံရတဲ့အခါ ပင်ပန်းခဲ့တယ်။
ကျွန်မ ကိုယ်အလေးချိန်ကြောင့် ညစာ မစားပဲ နေဖို့ ဖိအားပေး ခံရတဲ့အခါ ပင်ပန်းခဲ့တယ်။
မိန်းကလေးဆိုတဲ့ ဘောင်လေးထဲမှာ အတင်းအကြပ် ရှင်သန်ခိုင်းတဲ့အခါ ပင်ပန်းခဲ့တယ်။
ကျွန်မ က သက်မဲ့အရုပ်လေး တစ်ရုပ် အဖြစ်နေပေးခဲ့ရဖူးတယ်။
အိုး… သူတပါး စိတ်ကြိုက် နေခဲ့ရတုန်းက သနားစရာကောင်းလိုက်တာ…။
သတင်းစာကို လက်မှာကိုင်ရင်း ကျွန်မရဲ့ လူငယ်ဘ၀ ကို နှမျောမိတယ်။
ဘာလို့များ ဆုံးဖြတ်ချက်တွေ နောက်ကျခဲ့တာလဲလို့ ကြိတ်မနိုင် ခဲမရ ဖြစ်ရတယ်။
လောကကြီး တစ်ခုလုံးက စွန့်လွှတ်လိုက်ပါစေ။
ကျွန်မ ပါးပေါ်မှာ လက်ချောင်းရာတွေ မထင်ပဲ စီးကရက် ကို တရား၀င် လက်ထဲထည့်ခွင့်ရပြီမို့
စိတ်ချမ်းသာနေပါပြီ။
.
ခုတလော အဆင်မပြေဘူး။
အလုပ် နှစ်ခု ပြောင်းပြီးပြီ။
လက်ထဲမှာ ပိုက်ဆံ သုံးထောင်ပဲ ရှိတော့တယ်။
ချွေတာ စားရင်တောင် သုံးရက်စာ စားလို့လောက်ပါ့မလား…။
အလုပ် တစ်ခု ထပ်ရှာရမှာပေါ့။
နောက်ကြောင်းတော့ ပြန်မလှည့်ဘူး။
အခု အနေအထား မှာ ကျွန်မ ပျော်နေပြီ။
ကျွန်မ မျက်နှာမှာ စိတ်ရှိတိုင်း ညှစ်ခွင့်ရှိတဲ့ ၀က်ခြံဖုတွေနဲ့ အမာရွတ်တွေ ရှိနေတယ်။
အရပ် ငါးပေ မပြည့်လာပေမယ့် ဒေါက်ဖိနပ် မစီးမိဘူး။
မဖြောင့်တာ ကြာပြီဖြစ်တဲ့ ဆံပင်တွေက ကောက်တွန့်မွဲခြောက်တဲ့ အနေအထား။
ကျွန်မ နှုတ်ခမ်းတွေက စီးကရက် စိတ်ကြိုက်သောက်လို့ ခရမ်းရောင်ဘက်ကို သမ်းတယ်။
ကျွန်မ မျက်လုံးတွေက အိပ်ရေးမ၀တော့ ရှည်မျောမျော။
ကျွန်မ လက်ဖ၀ါး တွေက အလုပ်ကြမ်းတွေကြောင့် ကြမ်းတမ်းလာတယ်။
ကျွန်မ စိတ်တိုတဲ့ တစ်ခါတလေ စိတ်ရှိတိုင်းပေါက်ကွဲပစ်လိုက်တာပဲ။
ကျွန်မ ကြိုက်တဲ့ ဂျင်းဘောင်းဘီ နှစ်ထည်နဲ့ ကျွန်မ အ၀တ်အစားဖက်ရှင် က ပြည့်စုံနေပြီ။
ကျွန်မ စားချင်တဲ့ လမ်းဘေး အစားအစာ အကုန်စားခွင့်ရနေပြီ။
ပေါင်ချိန် တစ်ရာရှစ်ဆယ်ဆိုတာ များလို့လား။
၀ိတ်ချဖို့တော့ အစီအစဥ်မရှိသေးဘူး။
ကျွန်မ မမောပဲ အလုပ်တွေ လုပ်နိုင်သေးတယ်လေ…။
ကျွန်မ ကိုယ်ခန္ဓာကို ကျွန်မ ချစ်နေတုန်းပဲ။
ကျွန်မ ကိုယ် ကျွန်မ ပိုင်တယ်ဆိုတဲ့ ခံစားချက်ကို ကျွန်မြတ်နိုးတယ်။
ကျွန်မ ပါးဖောင်းနေပေမဲ့ လက်ချောင်းရာတွေ ကင်းနေတာ ကျွန်မအတွက် ဂုဏ်ယူစရာပါပဲ။
ကျွန်မ ဘ၀ ကျွန်မစိတ်ကြိုက်ပေါ့။
ကျွန်မ ပါးပေါ်ကို ဘယ်သူ့ လက်ချောင်းရာမှ ထပ်အရောက်မခံတော့ဘူးလို့ ဆုံးဖြတ်ခဲ့တာ ကျွန်မ
နောင်တမရဘူး။
ကျွန်မ ဘယ်လောက်ပဲ ပင်ပန်းဆင်းရဲ ကြမ်းတမ်းပါစေ။
ကျွန်မ မှန်ကြည့်တိုင်း စိတ်ချမ်းသာ နေတယ်။
လှောင်အိမ် တစ်ခုက လွတ်မြောက်လာခဲ့သူလို
ဘယ်တော့မှ လှောင်အိမ် ကို ပြန်မလွမ်းဘူး။
ကျွန်မ ကိုယ်ခန္ဓာကို ကျွန်မ စိတ်ကြိုက် ခြယ်လှယ်နေပေမဲ့။
ကျွန်မ ပါးပေါ်မှာ တစ်ချိန်ကလို လက်ချောင်းရာတွေ ရှိမလာတော့ဘူး။
ကျွန်မ ဘ၀မှာ လှောင်အိမ်ထဲက ထွက်လာတဲ့ အချိန်ကို ဂုဏ်အယူဆုံးပဲ။
တစ်စုံတစ်ယောက်ရဲ့ စိတ်တိုင်းကျ ရေးဆွဲလို့ရနေတဲ့ အရုပ်ခန္ဓာ မဟုတ်တော့ဘူး။
ကျွန်မ ကိုယ်ခန္ဓာသည် အမြဲတမ်း ကျွန်မပိုင် ဖြစ်နေမည်။
ကျွန်မ နှစ်သက်သလို စိတ်ကြိုက် ပုံဖော်မယ်။
ကျွန်မ ရဲ့ ရှင်သန်မှုသည် မိန်းကလေးဆိုတဲ့ ကန့်သတ်ဖိနှိပ်မှုကို ကျော်လွန်ပြီး ကျွန်မ စိတ်တိုင်းကျ ရွေးချယ်ထားသော ဘ၀မျိုး ဖြစ်ရမည်။

Read More

Winner – Aye Eaindray Maung

Feminist Literature Competition (Round 1)
Winner – Aye Eaindray Maung

လူသားတိုင်း မွေးဖွားလာချိန်တွင် မတူညီသော ရုပ်ပိုင်းဆိုင်ရာ အချိုးအစားများ၊ လိင်ပိုင်းဆိုင်ရာ ကွဲပြားမှုများ၊ အမျိုးမျိုးသော ကိုယ်ပိုင်ဟန်နှင့် စိတ်နေစိတ်ထားများ ကိုယ်စီပိုင်ဆိုင်ထားကြပါတယ်။ သို့ရာတွင် အစွဲအလမ်း၊ အယူအဆများ၊ ကြီးမားလွန်းသော ပတ်၀န်းကျင်တွင် ကျား၊ မ ရေးရာခွဲခြားမှုများ၊ အခြားသော လိင်စိတ်ခံယူထားသူများကို နှိမ်ချမှုများနှင့် ဖယ်ကျဥ်မှုများ ယခုထက်တိုင် ထင်ရှားစွာ နေရာယူလျက်ရှိနေပါတယ်။ အမျိုးသမီးများ အနေနှင့် မိမိ၏ ၀တ်စားဆင်ယင်ပုံနှင့် သွားလာနေထိုင်မှုများ ပေါ်မူတည်၍ အထင်အမြင်လွဲခံရမှုများ၊ အပြစ်တင်ခံရမှုများနှင့် လိင်ပိုင်းဆိုင်ရာ စော်ကားမှုများ ရင်ဆိုင်နေရလျက် ရှိပါတယ်။

အကယ်၍ ထိခိုက်ခံခဲ့ရသူက အမျိုးသမီးဖြစ်နေပါက ထိုအမျိုးသမီး၏ ၀တ်စားပုံ၊ အနေအထိုင်မတတ်ခြင်း၊ ညဘက်အပြင်ထွက်ခြင်း၊ ဘား၊ကလပ်များသို့ အမျိုးသမီးဖြစ်နေလျက်နှင့် သွားရောက်ခြင်း စသော အချက်များအပေါ် အပြစ်ပုံချခံရပြီး တကယ်ကျူးလွန်ခဲ့သူရဲ့ အမှားကို အများစုက မေ့နေတတ်ပါတယ်။
ကျမတို့အနေနဲ့ ငယ်ငယ်ကတည်းက ကျမတို့ ခန္ဓာကိုယ်ကို ချစ်တတ်ဖို့၊ လေးစားတတ်ဖို့နဲ့ တန်ဖိုးထားတတ်ဖို့ နည်းလမ်းမှန်စွာ သင်ကြားခံရဖို့လိုပါတယ်။ ထိုမှသာ ကိုယ့်ကိုယ်ကို ချစ်တတ်ပြိး အခြားသူများကလည်း ကျမတို့ကို လေးစားစွာဆက်ဆံမှာဖြစ်ပါတယ်။ သို့သော်လည်း ပတ်၀န်းကျင်၏ နည်းလမ်းမမှန်သော အယူအဆများ၊ လွှမ်းမိုးမှုများက ကျမတို့ မိမိကိုယ်ကိုလေးစားတတ်မှုနှင့် မိမိတို့၏ ခန္ဓာကိုယ်ကို ချစ်ခင်တတ်မှုများ ပျောက်ဆုံးစေပါတယ်။ ဥပမာအနေဖြင့် ကျမတို့ အပျိုဖော်၀င်စအချိန်တွင် မိန်းမပျိုလေးများအနေနှင့် ရာသီသွေးကို ညစ်ပတ်သောအရာ၊ ဖုံးကွယ်သင့်သောအရာ၊ ရှက်စရာကောင်းသောအရာအဖြစ် သင်ကြားခံခဲ့ရပါတယ်။ ကျမကိုယ်တိုင်လည်း ရာသီလာခြင်းက မိမိကို အမျိုးသားများထက် တစ်ဆင့်နိမ့်ကျစေတယ်လို့ ထင်ခဲ့ပါတယ်။ ကိုယ့်ကိုကိုယ်လည်း ရာသီသွေးပေါ်တဲ့အချိန်ကျရင် ကိုယ့်ရဲ့ ဖြစ်တည်မှုကို မကျေမနပ်ဖြစ်ခဲ့ဖူးပါတယ်။

ကျမတို့ အမိ၀မ်းထဲက ထွက်လာကတည်းက ဒီခန္ဓာကိုယ်ကြီးကို ပိုင်လာတာပါ။ ကျမတို့ရဲ့ ကိုယ်နေကိုယ်ဟန်၊ ကိုယ်ခန္ဓာအချိုးအစားကို ဘယ်သူကမှ စော်ကားပိုင်ခွင့်၊ လှောင်ပြောင်ပိုင်ခွင့် မရှိပါဘူး၊ ကိုယ်တိုင်ကလဲ သူတစ်ပါးကို လှောင်ပြောင်၊ ကဲ့ရဲ့၊ ဝေဖန်လို့ မရပါဘူး။ ကျမတို့အနေနဲ့ တစ်ပါးသူကို မထိခိုက်သရွေ့ ကျမတို့ လွတ်လပ်စွာ ပြုမူနေထိုင်သွားလာခွင့် ရှိပါတယ်။ ကျမတို့ရဲ့ ခန္ဓာကိုယ်ဖြစ်တည်မှုကို ဘယ်သူကမှ မည်သည့်အကြောင်းနှင့်မျှ ထိန်းချုပ်ပိုင်ခွင့် မရှိပါဘူး။ ထိန်းချုပ်ဖို့ ကြိုးစားလာရင်လည်း ကျမတို့ အနေနဲ့ ငြိမ်ခံနေစရာ အကြောင်းမရှိပါဘူး။ မြန်မာနိုင်ငံမှာ အမျိုးသမီးတွေ နေ့စဥ်ဘ၀ သွားလာလှုပ်ရှားမှုမှာ နှုတ်နှင့်ဖြစ်စေ၊ ကိုယ်ထိလက်ရောက်ဖြစ်စေ၊ လိင်ပိုင်းဆိုင်ရာ စော်ကားမှုတွေ ကြုံတွေ့နေရပါတယ်။ ကျမကိုယ်တိုင်လည်း လမ်းသွားရင် စိတ်လုံခြုံမှု မခံစားရပါဘူး။ အထူးသဖြင့် ဘောင်းဘီတို၊ စကပ်တိုတွေ ၀တ်ထားတဲ့ အချိန်ပေါ့။ “ဘယ်သူကများ ငါ့ကို အန္တရာယ်ပေးသွားမလဲ” ဆိုပြီး အမြဲလန့်နေရပါတယ်။ အမျိုးသမီးတွေ အန္တရာယ်ပြုခံရတဲ့ အချိန်မှာလည်း ပြန်ပြောရဲသူ၊ ပြန်တိုင်ရဲသူက အရမ်းရှားပါးတာ အားလုံးအသိ ဖြစ်ပါတယ်။

ဘာလို့လဲဆိုတော့ ကျမတို့က ခံရသူကိုပဲ အပြစ်တင်တဲ့ ပတ်၀န်းကျင် အသိုင်းအ၀ိုင်းမှာ ကြီးပြင်းလာလို့ပဲ ဖြစ်ပါတယ်။ လိင်ပိုင်းဆိုင်ရာ စော်ကားခံရလို့ စိတ်ထိခိုက်နေချိန်မှာ ကိုယ့်ကိုထပ်ပြီး အပြစ်တင်မယ့် ပတ်၀န်းကျင်ရဲ့ဒဏ်ကို ကျမတို့ မခံစားနိုင်ပါဘူး။ အမျိုးသားပဲဖြစ်ဖြစ်၊ အမျိုးသမီးပဲဖြစ်ဖြစ် ကိုယ့်မျက်စိရှေ့မှာ လိင်ပိုင်းဆိုင်ရာစော်ကားခံနေရတာတွေ့ရင် ၀ိုင်း၀န်းကူညီပေးဖို့ လိုအပ်ပါတယ်။ ခံရသူကို အပြစ်တင်မနေပဲ ၀ိုင်း၀န်းဖေးမပေးရမှာပါ။ ကိုယ့်သားယောကျာ်းလေးတွေကို ဒီလိုမလုပ်ဖို့ သင်ကြားပေးရမှာပါ။
ကျမနှင့် ကျမခန္ဓာကိုယ် အကြောင်းကိုပြောရင် နောက်တစ်ခု မပါမဖြစ်ကတော့ ကိုယ်၀န်ဖျက်ချခွင့်ပါ။ ကိုယ်၀န်ဖျက်ချခွင့်လို့ ကြားလိုက်ရင် အများစုကတော့ မကောင်းတဲ့အရာ၊ မလုပ်သင့်တဲ့အရာလို့ မြင်ကြမှာ အသေအချာပါ။ ဒါပေမယ့် ဒီကိုယ်၀န်ချက်ချခွင့်ဟာ လူ့အခွင့်အရေးပဲဖြစ်ပါတယ်။ မလိုလားအပ်ပဲ (သို့မဟုတ်) မလိုချင်ပဲ ရလာသော ကိုယ်၀န်၊ သက်ငယ်မုဒိန်းမှုကြောင့်ရလာသော ကိုယ်၀န်၊ အတူနေထိုင်မိလို့ ရလာသော ကိုယ်၀န် စသဖြင့် အမျိုးမျိုးရှိကြပါတယ်။ ဘယ်လိုအကြောင်းကြောင့်ပဲဖြစ်ဖြစ် အမျိုးသမီးတွေအနေနဲ့ကတော့ ကိုယ်ရလာသော ကိုယ်၀န်ကို ဖျက်ချပိုင်ခွင့်ရှိသင့်ပါတယ်။ ကျန်းမာရေးရှုထောင့်ကပဲဖြစ်ဖြစ်၊ လူ့အခွင့်အရေးရှုထောင့်ကပဲဖြစ်ဖြစ် ဒါဟာလိုအပ်နေတဲ့ အရာတစ်ခုပါ။ ကျမတို့ ခန္ဓာကိုယ်၊ ကျမတို့ရဲ့ ဆုံးဖြတ်ချက်ကို ဘယ်သူကမှ၀င်မစွက်ဖက်ပဲ လေးစားပေးရမှာပါ။ ကိုယ်၀န်တရား၀င် ဖျက်ချခွင့်ပေးခြင်းဟာ လူ့လောကကို မလိုချင်ပဲနဲ့ ရောက်လာရပြီး ကောင်းကောင်းပြုစုမခံရပဲ ဒုက္ခခံ ကြီးပြင်းလာရမယ့် ကလေးငယ်အရေအတွက် လျော့နည်းသွားမှာပဲဖြစ်ပါတယ်။

အချုပ်အားဖြင့်ပြောရမယ်ဆိုရင် ကျမတို့အမျိုးသမီးများအနေဖြင့် ကျမတို့ရဲ့ ခန္ဓာကိုယ်အပေါ်မူတည်၍ စော်ကားခြင်း၊ လှောင်ပြောင်ခြင်း၊ ဖိနှိပ်ခြင်းနှင့် အပြစ်တင်ခြင်း စသော အခွင့်အရေးချိုးဖောက်မှုများ နေ့စဥ်ကြုံတွေရလျှက်ရှိပါတယ်။ အမျိုးသားဖြစ်စေ၊ အမျိုးသမီးဖြစ်စေ မိမိတို့၏ ခန္ဓာကိုယ် (သို့မဟုတ်) မိမိတို့ခန္ဓာကိုယ်နှင့် ပတ်သတ်သော ဆုံးဖြတ်ချက်ကို မည်သူကမျှ အပြစ်တင်ပြောဆို၊ ဝေဖန်၊ ဆုံးဖြတ်ပိုင်ခွင့် မရှိပါဘူး။ ထိုအဖြစ်အပျက်များ တဖြည်းဖြည်း ပျောက်ကွယ်သွားဖို့ အမျိုးသား၊ အမျိုးသမီး တစ်ယောက်ချင်းစီမှာ တာ၀န်ရှိပါတယ်။ အချင်းချင်း စိတ်လုံခြုံရသော ပတ်၀န်းကျင်များ ဖန်တီးပေးဖို့ လိုအပ်ပါတယ်။ တစ်ယောက်နှင့် တစ်ယောက် လေးစားမှု၊ အားပေးကူညီမှုနှင့် ကိုယ်ချင်းစာတတ်မှုများက အမျိုးသမီး၊ အမျိုးသား တန်းတူညီမျှရေးလှုပ်ရှားမှုတွင် အများကြီးအရေးပါ ပါတယ်။ ကိုယ်ချင်းစာစိတ်ပြည့်၀ပြီး လေးစားတတ်သော နိုင်ငံသားများ ဖြစ်လာစေရေးအတွက်လည်း ကောင်းမွန်သော ပညာရေးစနစ်က အခြေခံလိုအပ်ချက်တစ်ခုဖြစ်ပါတယ်။ လူဖြစ်လာတဲ့ ဘ၀ခဏမှာ အမျိုးသား၊ အမျိုးသမီးနှင့် အခြားလိင်စိတ်ခံယူထားသော မည်သူမဆို လူ့အခွင့်အရေး ပြည့်ပြည့်၀၀ ခံစားသင့်ပါတယ်လို့ပြောရင်း နိဂုံးချုပ်လိုက်ပါတယ်။

Read More
purple feminist

အမျိုးသမီးဝါဒီဆိုတာဘာလဲ?

အနောက်တိုင်းယဉ်ကျေးမှုတွေမြန်မာနိုင်ငံကိုပြန့်နှံ့လွှမ်းမိုးလာတဲ့အထဲအမျိုးသမီးတွေလက်ခံလာကြတဲ့လွှမ်းမိုးမှုကောင်းတစ်ခုကတော့(Feminism) ဖီမစ်နစ်စင်အမျိုးသမီးဝါဒီပဲဖြစ်တယ်။ဒါပေမယ့်ဖီမစ်နီစင်ရဲ့အဓိပ္ပာယ်ကိုကောင်းကောင်းမသိကြသေးတဲ့သူတွေအများကြီးရှိနေကြပါသေးတယ်။

Read More
purple feminist

မြန်မာ့ယဉ်ကျေးမှုထိန်းသိမ်းဖို့ အမျိုးသမီးတွေရဲ့အခန်းကဏ္ဍ

မြန်မာမိန်းကလေးတစ်ယောက်အနေနဲ့ မြန်မာ့ယဉ်ကျေးမှုကိုထိန်းသိမ်းရမယ်ဆိုတာက နိစ္စဓူဝ ကြားရတဲ့ စကားတွေပါပဲ။ မြန်မာ မိန်းကလေး ၁၀ ယောက်မှာ ၉ ယောက်လောက်ဟာ မြန်မာမိန်းကလေး မလို့ မြန်မာလိုပဲ လုံလုံခြုံခြုံဝတ်ရမယ်၊ အပြောအဆိုဆင်ခြင်ရမယ်၊

Read More
purple feminist

Lost in Violence ( Sexual Abuse)

ကျွန်မက ရှမ်းပြည်မြောက်ပိုင်း မန်စံရွာ မွေးဖွားကြီးပြင်းခဲ့ပါတယ်။ မန်စမ်ဟာရာသီဥတု သာယာပြီး လူမျိုးစုများစွာ အတူတကွ ပူးပေါင်းနေထိုင်ကြတဲ့ ချစ်စရာ ရွာလေးတစ်ရွာပါ ကျွန်မအသက် (၇) နှစ်အရွယ်တုန်းက ကျွန်မတို့အိမ်ကို မကြာခဏ ၀င်ထွက်နေကျဖြစ်တဲ့ အသက်ကြီးကြီး အဘိုးအရွယ် အမျိုးတစ်ဦးရှိပါတယ်။

Read More
purple feminist

လူဦးရေတစ်ဝက်လောက်က အမျိုးသမီးတွေဖြစ်နေတာကို ကိုယ်တို့ဟာ တစ်လတစ်ခါရာသီလာတာကို ဖုန်းကွယ်စရာ လိုလို့လား?

ရာသီလာတဲ့ကိစ္စနဲ့ပတ်သက်ပြီး အကြီးမာဆုံး လွှမ်းမိုးမှုက မိန်းမတွေကိုယ်တိုင်ပဲလို့ထင်တယ်။ ရာသီလာတဲ့အခါမိသားစုထဲက မိန်းမတွေက သွေးတွေက ရွံစရာ သွေးပုပ်တွေ၊ မကောင်းတဲ့အညစ်အကြေးတွေလို့ပြောကြတယ်။ ငယ်တုန်းကတော့ ယုံတာပေါ့၊ ငါခန္တာကိုယ်ကြီး ညစ်ပတ်ပါလားလို့။


Read More
purple feminist

နေမဝင်အပြုံး(အပိုင်း-၁)

လူ့ဘဝကား ဆန်းကြယ်လှသည်။ ကျား/မ ဟူသော ဆောင်ပုဒ်ကို မည်သူက မည်သည့်အတွက် ဖွဲ့စည်းခဲ့သည်ကို ကျွန်တော်မသိပါ။ သို့သော် လုပ်ခဲ့သူသည် လွန်စွာ မျှတသည်။ တွေးတော၍ အတွေးနှောသူများသာ မမျှတပေ။ ဥပမာ ဆိုကြပါစို့ “အားနွဲ့သော မိန်းကလေး” ဟူသည့်

Read More
purple feminist

ရာသီပုံမှန်လာတာက ကောင်းတဲ့အရာတစ်ခုပါ…

မိန်းကလေးအများစုဟာ ရာသီသွေးပေါ်တဲ့ကိစ္စကို Blessing တစ်ခုလို မြင်မယ်မထင်ဘူး။ ကိုယ်ကတော့ မြင်တယ်။ အဲ့လို မြင်တတ်ဖို ခံစားတတ်ဖို့ ကိစ္စကလည်း အတွေ့အကြုံနဲ့တော့ ဆိုင်တာပေါ့။


Read More
purple feminist

လစဉ်ရာသီလာတာက ရှက်စရာမဟုတ်ပါဘူး

ရာသီလာလို့ ဆိုင်တွေမှာ ‘ဂွမ်းထုပ်’ (Pad) သွားဝယ်ရင် ကျွပ်ကျွပ်အိပ် အမဲနဲ့ ဒါမှမဟုတ် သတင်းစာနဲ့ ပတ်ပြီး ထည့်ပေးလေ့ရှိတယ်။

နောက်ပြီး ရာသီလာလို့ ထမီမှာသွေးစွန်းသွားရင် ကျောင်းစိမ်းပေါ်မှာ အနီကွပ်ကြီးနဲ့ဆိုတော့ ဟာကနဲ ဟင်ကနဲပဲ။ ရာသီလာတဲ့နေ့တွေဆိုရင် ‘ငါ့မှာပေနေလား။ ကြည့်ပေးပါဦးလို့’

Read More
purple feminist

Why should we celebrate menstruation?

ရာသီလာတာကို ဘာကြောင့်ဂုဏ်ယူသင့်သလဲ?
ငယ်ငယ်တုန်းက ဓမ္မတာရာသီလာတာ ရှက်စရာလို့ထင်ဖူးတယ်။ ရာသီသွေးက တကယ်ညစ်ပတ်တယ်လို့ပဲ ထင်ခဲ့တယ်။ဒီအချက်အလက်တွေကို မသိခင်တုန်းကပေါ့။


Read More